Endlich ommi Füür im Härz (oder underùm Füdle)
Tschö, was isch das lösch Jaar für a fertiga Mûscht gsi zum zueggùgge. De Klub het eppa autz fautsch gmacht womu numu cha fautsch mache. Vo de oberschti Etaga bis zum hinderschte Maa im Gou, sì sii au 'zero' gsi. Paps ù nì sii aube jusch lätz cho, as het ehrlich gsiit töüwiis sogar fasch aagschisse a
match zgah. Gäge tum Endi anni, so ab de Aabschtiigsrundi, siimer nit amau meh gange, ù üser Billet het o niemer me welle. Aber defûûr hììmer das Jaar ommi vûü Frûûd, Gottéron ischa vo Afang an paraat gsi. De Cönzu het abgnoh ù isch nüme fetta, d'Verteidiger liisme nüme di ganzi Zyyt chapene, de chliina (Bykov) schlöflet ommi wie nas Härrgöttli u voor git eppa auts ichi. Sogar üsa Chancetod Fritsche het us gfüeti 0 Schüss scho 4 Töpf gschosse, ä rütscht ifach itz mitum Pögg über d'Linia anschtatt mitts ùfe Goalie zschiesse. Autz was lösch Saison gföüt het isch das Jahr ommi da, itz fägts ommi ga zggùgge. Ma gseht äbe scho, dass si itz mit Füür underùm Füdle schpiile. Ini va de einzige Sache womer nit so gfalle het i löscher Zyyt isch, dass mer dä Riviera hìì müesse ga hole. I mììne, im Sùmmer hììmer endlich di Pflutta va Helbling chene wäggäh, ù nai rììchemer aber so na Pûntu wie de Riviera. Ä bringt scho nit vöü, ä giit eppa 4-5 mau uf zyysch, nietet as paar Gägner uum, aber spilerisch bringt er nüt. Voilà asch haut mini mììnìg.
Gottéron isch ommi zGottéron wimers liebe u kenne: auso Davos, Bärn, ZSC alli gueti laamer gredi ay, aber gäge Lausanne, Langnau ù Ambri verlieremer de, typisch Gottéron haut. I schtuune aber, dass es nüme so vöü uusverchuuft isch. Vùlicht si dPriise itz ifach zhoi, ù dLüt wììna nüme jeda Match gseh, oder aber sì sii no traumatisiert va lösch Jahr, wär wììss.
Zum Schluss wetteni no eppis aschpräche. Znüa Motto vam Klub isch ja : "Pour une fois, pour toujours". I füne uf Seislertütsch hiisst das nit "Für einisch, für immer", sondern as setti hiisse "Für inisch, für ging!" Has numu wele sääge, gsesch wie quoi.
Ebe hùi, bis baud ommi, späteschtens eppa i de iischhalla.